Осыдан тура бір жыл бұрын, 2023 жылдың 6 ақпан күні Түркияда жойқын жер сілкінісі болды. Түркияда болған бұл табиғи апат «Ғасыр апаты» деп сипатталды.
ҚР СІМ-нің баспасөз қызметінің хабарлауынша, Қазақстан ТМҰ-дағы Төраға ретінде Түркияға барынша тезірек қалпына келуіне тілектестігін білдіріп, «Ғасыр апатының» бір жылдығына орай Түркия халқына көңіл айтты. Бүгінде Түркияда жер сілкінісі болған аймақтар қалпына келтірілуде.
Тccb.gov.tr мәліметінше, 3 ақпанда Түркия президенті Режеп Тайып Ердоған «Ғасыр апатынан ғасырлар бірлігіне» ұранымен жер сілкінісі салдарынан баспанасынан айырылған азаматтарға үй кілттерін табыс етті.
Түркия президентінің айтуы бойынша, жер сілкінісі болған аймақта 7 мың 275 азаматқа баспана кілті табысталған және тағы 75 мың үйдің кілті 2 ай ішінде беріледі.
Жер сілкінісінен кейін Түркияға әлемнің 90 елі көмек қолын созып, қиын кезеңде қолдау көрсетті.
Қазақстан Түркиядағы жер сілкінісіне бейжай қарай алмады. Қазақстан Түркияға қаржылай көмек беруімен қатар құтқарушыларды жіберіп, апат салдарын жоюға белсене атсалысты.
Жер сілкінісі – ең қауіпті табиғат құбылыстарының бірі. ЮНЕСКО деректеріне сүйенсек, табиғи апаттардың ішінде зілзала экономикалық шығын мен адам шығыны бойынша бірінші орынды алады.
Түркияда былтыр болған жер сілкінісі салдарынан 50 мыңнан астам адам көз жұмды, ел экономикасына біраз шығын келді.
Еске сала кетсек, 2023 жылғы 6 ақпанда Түркияда 7,7 және 7,6 балдық күшті жер сілкінісі тіркелді.



















