Жыл сайын 23 сәуірде Түркияда Ұлттық егемендік күні мен балалар мерекесі аталып өтеді. Елде бұл мейрам ресми демалыс күні болып саналады.
Кеше, 23 сәуірде Түркия үшін өте маңызды мереке аталып өтті.
23 сәуір — Түркия Республикасының Ұлттық егемендік және балалар мерекесі. Осыдан 103 жыл бұрын түрік халқының бостандығы мен құқығының кепілі – Түркия Ұлы Ұлттық Мәжілісі құрылып, ұлт көшбасшысы Мұстафа Кемал Ататүрік бұл күнді өскелең ұрпаққа арнайтынын жария еткен.
Бұл күн жылда ел көлемінде тойланып, азаттықтың айшықты белесі дәріптеледі. Биыл да ел басшылары Ататүріктің қабіріне зиярат етіп, оның түрік халқына аманат етіп қалдырған тәуелсіздікті көздің қарашығындай сақтайтынын мәлімдеді. Түркия Ұлы Ұлттық Мәжілісі төрағасы Мұстафа Шентоп атаулы күнге арналған шара барысында: «103 жыл Ұлттық егемендік пен толық тәуелсіздігімізден қол үзбегенбіз. Алдағы ғасырларда да осы жолмен жүретін саналы ұрпақ өсіруді мақсат тұтып келеміз. Түркия Республикасы ұлтымыздың сенімді қолында мәңгілікке жалғасады»,-деді.
Түркияда мектеп шағындағы балалар бұл күнді ерекше ықыласпен атап өтеді.
Анықтама: Түркияда 23 сәуір күні ресми түрде «Түркияның Ұлттық тәуелсіздік және балалар күні» деп аталады. Сондықтан бұл күнді атап өту барысында балаларға көңіл бөлінеді. Тіпті, Үкімет мүшелері, Президент және Парламент бір күн өз орындарын балаларға береді. Мектеп оқушылары сол күні балаларды және қоршаған ортаны қорғауға қатысты заңдарды талқылап, кішігірім заңдарға қол қояды. Бұл «болашақ балалар мен жастардың қолында» деген оймен жасақталған мереке.



















