Тәжікстан астанасы Душанбе қаласында құрылыс материалдары бойынша Өзбекстан сауда үйі ашылды.
Еуразия Тудейдің Ховар агенттігіне сілтеме жасап хабарлауы бойынша, Өзбекстан сауда үйі Өзбекстан мен Тәжікстан арасындағы құрылыс материалдарының экспортын одан әрі арттыру және екі мемлекеттің іскер топ өкілдері арасындағы сауда қатынасын дамыту мақсатында ашылды.
Жоба «Узсаноатқурилишматериаллари» қауымдастығының бастамасымен жүзеге асырылып, сауда байланыстарын кеңейтуге бағытталған.
Шараның ашылу салтанатына Тәжікстан Республикасының Индустрия және жаңа технологиялар министрлігінің басшылығы, Өзбекстанның Тәжікстандағы Елшілігінің және «Узсаноатқурилишматериаллари» қауымдастығының өкілдері қатысты.
Шараға қатысушылар сауда үйінде жасалған жағдайлармен, құрылыс материалдарының көрмесімен танысу мүмкіндігіне ие болды. Сонымен қатар, шара аясында екі ел кәсіпкерлері арасында B2B кездесулер ұйымдастырылды.
Тәжікстанда «Made in Uzbekistan» брендімен құрылыс материалдарына сұраныс жылдан жылға артып келеді. Шара барысында Өзбекстанның құрылыс материалдарының сыртқы экономикалық қызметі басқармасының басшысы Меһродж Ботиров атап өткендей, Тәжікстан өзбекстандық құрылыс материалдарын экспорттау бойынша екінші орында тұр.
2024 жылы Тәжікстанға жалпы құны 115 миллион доллар болатын құрылыс материалдары жеткізілген. 2025 жылы «Узсаноатқурилишматериаллари» қауымдастығы материалдар экспортын екі есеге арттыруды жоспарлап отыр.


















