Өзбекстан Президенті Шавкат Мирзиеевтің шақыруымен Қатар Мемлекетінің Әмірі шейх Тамим бен Хамад Әл Тани бүгін, 19 желтоқсан күні Ташкентке келеді.
Uzdaily.uz агенттігінің мәліметінше, Қатар Әмірі сыбайлас жемқорлыққа қарсы күрес саладағы жоғары халықаралық марапатты тапсыру рәсіміне қатысады.
2016 жылдан бастап Қатар Әмірінің бастамасымен құрылған сыйлық жыл сайын белгілі қоғам қайраткерлеріне, сарапшылар мен журналистерге олардың жаһандық деңгейде сыбайлас жемқорлыққа қарсы күреске қосқан үлесі үшін беріліп келеді.
Сапар аясында жоғары деңгейдегі келіссөздер де өтеді деп күтілуде. Сонымен қатар Өзбекстан Президентінің биылғы 1-2 қазанда Қатарға мемлекеттік сапары барысында бірінші кезекте саяси, сауда-экономикалық, инвестициялық және мәдени-гуманитарлық салаларда қол жеткізілген уағдаластықтарды жүзеге асыру барысы қарастырылады.
Сондай-ақ саясат, сауда, экономика, инвестициялар және мәдени ынтымақтастық мәселелеріне басты назар аударылып, күн тәртібіндегі халықаралық және өңірлік мәселелер бойынша пікір алмасылады.



















