Ауғанстанда жақсылыққа үндеп, жамандықтан жирендіретін министрліктің қызметкерлері 500 музыкалық аспапты отқа жағып жіберді.
Еуразия Тудейдің хабарлауы бойынша, Парван провинциясы тұрғындарынан тәркіленген музыкалық аспаптар “адамгершілікті аздыратын құралдар” деп аталды.
Министрліктің өңірлік департаменті 500-ден астам музыкалық аспап пен соған ұқсас заттардың жойылғанын мәлімдеді.
Департамент басшысы Макбул Ахмад Вакастың айтуы бойынша, жергілікті тұрғындар бұл аспаптарды би мен мерекелік шараларда қолданған.
Pajhwok агенттігінің мәліметінше, барлық заттар соңғы бір жыл ішінде Чарикар қаласы мен провинция аудандарынан жиналған.
Ауғанстанның Ұлттық музыка институты Парван провинциясында Талибанның 500-ден астам музыкалық аспапты өртеуін “мәдени мұраға тікелей шабуыл және ауған өнерін жою әрекеті” деп айыптады.



















