Ким Чен Ын қыркүйек айында Ресейге барып, Ресей Президенті Владимир Путинмен келіссөздер жүргізіп, Мәскеуді Украинадағы соғыс үшін қару-жарақпен қамтамасыз ету мүмкіндігін талқылауды жоспарлап отыр.
The New York Times газетінің хабарлауынша, КХДР Мемлекеттік кеңесінің төрағасы мен Ресей Президентінің кездесуі 10-13 қыркүйек аралығында Шығыс экономикалық форумы өтетін Владивосток қаласында өтуі мүмкін.
Пхеньяннан сирек шығатын Ким Чен Ын бронды пойызбен Ресейдің Тынық мұхиты жағалауына барады деп болжанып отыр.
Батыс ақпарат көздері Владимир Путин мен Ким Чен Ын жаһандық оқшаулану жағдайында өзара ынтымақтастықты нығайтуға ниетті деп болжайды. Ресей Федерациясына снарядтар мен танкке қарсы зымырандар қажет, оларды Солтүстік Корея бере алады. Ал КХДР оның орнына Ресейден ядролық суасты қайықтарын және әсіресе спутниктерді жасау технологиясын ала алады.
Америка Құрама Штаттары екі ел арасындағы әскери байланыстардың күшейіп келе жатқанына алаңдаушылық білдірген шақта Кимнің Ресейге бару жоспары мәлім болып отыр. Оның үстіне, жақында Ресей Солтүстік Кореямен бірлескен әскери жаттығулар өткізуді ойластырып жатқанын хабарлаған болатын.



















