Латын Америкасы елдерінің басшылары Иранның сегізінші президенті Ибраһим Раисидің тікұшақ апаты кезінде серіктерімен бірге қайтыс болуын қайғыра қабылдап, көңілдерін білдірді.
Еуразия Тудейдің Anadolu агенттігіне сілтеме жасап хабарлауы бойынша, Латын Америкасы елдерінің, соның ішінде Бразилия, Венесуэла, Боливия және Колумбия басшылары Иранның сегізінші президенті Ибраһим Раисидің тікұшақ апаты кезінде серіктерімен бірге қайтыс болуына байланысты Иран үкіметі мен халқына көңіл айтты.
Колумбия үкіметі бұл оқиғаға қатты өкініш білдіріп, Иран Президенті Сейед Ибраһим Раиси мен Сыртқы істер министрі Хоссейн Амир Абдуллаһианның және басқа да тікұшақ апатынан қайтыс болғандардың отбасына көңіл айтты.
Бразилия Президенті Лула да Силва бұл қайғылы оқиға туралы хабар қатты күйзелткенін тілге тиек етіп, тікұшақ апатынан қайтыс болғандардың отбасыларына, Иран үкіметі мен халқына көңіл айтты.
Бразилия үкіметі де қайғылы оқиғаға байланысты көңіл айтты. Бразилия үкіметінің мәлімдемесінде Иран президенті Ибраһим Раиси, Сыртқы істер министрі Хоссейн Амир Абдуллаһианның және басқа да тікұшақ апатынан қайтыс болғандардың отбасына, сондай-ақ Иран үкіметі мен халқына осы орны толмас қайғыға байланысты шын жүректен көңіл айтатыны айтылады.
Боливия Президенті Луис Арсе Иран Президенті мен оның серіктерінің тікұшақ апатынан қайтыс болғаны туралы хабарға реакция білдіріп, Иран Президентімен кездесуін жылулықпен еске алып, оның көшбасшылығы мен ынтымақтастыққа деген адалдығын атап өтті. Боливия Президенті осы қайғылы оқиғаға байланысты Иран үкіметі мен халқына көңіл айтты.
Венесуэла Президенті Николас Мадуро Ибраһим Раисидің қайтыс болғаны туралы хабарға қатты таңғалғанын айтып: «Үлгілі адам әрі әлемнің көрнекті көшбасшысымен қоштасқаныма өте өкінемін. Ибраһим Раиси- ұлы адам. Ол өз елінің егемендігін және біздің еліміз үшін сөзсіз достықты қорғаушы болды», деді. Венесуэла Сыртқы істер министрлігі де бұл оқиғаға өкініш білдірді.
Куба Президенті Мигель Диас-Канель Ибраһим Раисидің қайтыс болуына байланысты көңіл айтып, оны үлкен дос және құрметті саясаткер ретінде сипаттады.
Ибраһим Раиси жексенбі күні түстен кейін Шығыс Әзірбайжан провинциясында Qız qalası бөгетін ашу рәсімінен қайтқан сәтте апатқа ұшырады. Иран Президенті Ибраһим Раиси және оның жанында болған ресми тұлғалар апаттан қайтыс болды.
Тікұшақ ішінде Ибраһим Раиси, СІМ басшысы Хоссейн Амир Абдуллаһиан, Шығыс Әзірбайжан губернаторы Малек Рахмати, Тебриз қаласының жұма намазы имамы аятолла Мохаммад Әли әл Хашем, Президенттік қауіпсіздік бөлімшесінің қолбасшысы Сейед Маһди Мусави және тікұшақтың басқа да экипаж мүшелері болды.



















