Өзбекстанда алдағы уақытта электронды темекіге тыйым салынбақ.
Еуразия Тудейдің Daryo. Uz сайты жариялаған мәліметке сілтеме жасап хабарлауы бойынша, кеше, 6 қаңтар күні Өзбекстан Олий Мәжілісінің заң шығару палатасының депутаттары елде электронды темекі айналымына тыйым салуға бағытталған заң жобасын талқылады.
Бұл заң жобасы никотин мен темекі өнімдерінің түрлерін өндіру, дайындау, сақтау, тасымалдау немесе өткізуді және оларды ел аумағына әкелуге тыйым салуды қарастырады.
Заң жобасында электронды темекі өнімдерін әкелуге немесе экспорттауға қатысы бар тұлғаларға қатысты әкімшілік және қылмыстық жауапкершілік туралы ережелер де бар.
Депутаттар заңсыз импорттың көбеюіне, әсіресе жастар арасында электронды темекі танымалдылығының артуына алаңдаушылық білдірді.
Отырыста “Милли тикланиш” Демократиялық Ұлттық жаңғыру партиясының жетекшісі Алишер Қадыров бұл тыйымды бірден қолдады.
Қадыров әлемнің отыз екі елінде электронды темекіге тыйым салынғанын айтып, елінде электрондық темекіге қатаң тыйым салынбайынша, олардың таралуына қарсы тұруды жалғастыратынын айтты.
Фракция мүшелері бұл заң жобасын алғашқы оқылымда бірауыздан мақұлдады.
Өзбекстанда электронды темекіге тыйым салу туралы ұсыныс Денсаулық сақтау министрлігінің 2024 жылдың сәуір айында ұсынған бастамасының жалғасы болып табылады. Заң жобасында тыйым салуды бұзғаны үшін айыппұлдар қарастырылған.



















