Халық Құрылтайы Бішкек қаласында 15-16 желтоқсанда Қырғыз Республикасының Президенті Садыр Жапаровтың қатысуымен өтеді.
Қырғыз Республикасының Мемлекеттік хатшысы Сүйінбек Қасмамбетовтың жетекшілігімен 11 желтоқсанда Халық құрылтайына байланысты өткен отырыста Мемлекеттік хатшы халықтық құрылтайға арнайы құрметті қонақтар шақырылмайтынын айтты. Оның айтуынша, Халықтық құрылтай нақты мәселелерді шешетін, жұмыс жүргізетін алаңға айналады.
Айта кетейік, Қырғызстандағы Халық құрылтайына биыл сайланған 700 делегат қана қатыса алады.
Оның ішінде республиканың барлық облыстарынан 640 делегат, этнос өкілдерінен 30 делегат және шетелдегі еңбек мигранттарынан 30 делегат бар. Сонымен қатар, Халық құрылтайының жұмысына делегаттардан бөлек, Жогорку Кенеш депутаттары, Министрлер кабинетінің мүшелері, мемлекеттік органдар мен жергілікті өзін-өзі басқару органдарының өкілдері қатысады.
Қырғызстандағы Халық Құрылтайы – қоғам мен мемлекеттің экономикалық және әлеуметтік дамуының маңызды мәселелерін шешу мақсатында өткізетін қоғамдық жиналыс.



















