Қырғызстан мектептерде оқушылардың сыныптарды жинап, жуу жүйесін енгізуді көздеп отыр. Бұл туралы Қырғыз Республикасының Ғылым және білім министрі Догдуркүл Кендирбаева «Қырғызстан радиосына» берген сұхбатында мәлімдеді.
КР Білім министрлігінің басшысы мектептерде оқушылар білім алып отырған кабинеттерін өздері жинауды бастайтынына тоқталып, ата-аналарды баланың құқықтары бұзылды деген ойдан аулақ болуға шақырды.
Догдуркүл Кендирбаева сөзінде басқа елдерде мұндай тәжірибе бар екенін, тіпті Жапонияда мектеп оқушылары өз сыныптарын жуумен қатар, мектеп дәретханаларын да тазалайтынын айтты. Догдуркүл Кендирбаеваның айтуы бойынша, жаңа жүйе арқылы балалар өздеріне қызмет етуді және басқалардың жұмысын құрметтеуді үйренеді.
Кезекшілік жүйесі жоғары және төменгі сынып оқушыларына да енгізіледі.
Білім министрі Догдуркүл Кендирбаеваның жаңа жүйені енгізу жөнінде айтылған ұсынысына қатысты білім саласындағы сарапшы Екатерина Касымова мектеп оқушыларының сыныптарда едендерді жуу бастамасы қалыпты, алайда дәретханаларды оқушылар тазаламау керек деген пікір білдірді.
Сарапшы оқушыларды еңбекке баулудың еш зияны жоқ екендігін, ең бастысы ата-аналардың дұрыс түсінуі маңызды екендігін айтты.



















