Өзбекстан мен Беларусь ауыл шаруашылығы техникасын құрастыру бойынша лицензиялық келісімдерге қол қойды.
Беларусь Өнеркәсіп министрлігінің хабарлауы бойынша, «Минский моторный завод» ашық акционерлік қоғамы мен «Planeta Servis» шектеулі серіктестігі Өзбекстанда дизельдік генераторлар және компрессорлық станцияларды құрастыру жөнінде жаңа жоба бойынша келісімге келді.
Алдағы уақытта аталмыш компаниялар Өзбекстанда ауылшаруашылық тракторларын шығару жобасын жүзеге асыруды жоспарлап отыр.
Өзбекстанда салынатын құрастыру цехы жаңа жұмыс орындарын ашумен қатар, технология импортын жүзеге асыруға септігін тигізеді деп күтілуде.
Бұған дейін Беларусь елінің Өзбекстандағы Елшісі Леонид Маринич «Беларусь 1» телеарнасына берген сұхбатында Беларусь президенті Александр Лукашенко Өзбекстан президенті Шавкат Мирзиеевтің БелАЗ құрастыру өндірісі бойынша бірлескен кәсіпорын құру туралы ұсынысын қолдағанын айтты.
Сондай-ақ, 7 ақпанда Өзбекстан мен Беларусь вице-премьерлері өзара тауар айналымын 1 млрд долларға жеткізуге келісті.
Соңғы жылдары екі ел арасында бірлескен кәсіпорындар саны 4 есеге өсті.



















