Өзбекстанның Наманган қаласында 27 қазан мен 29 қазан аралығында II Халықаралық бал фестивалі өтті.
Фестиваль гүлдер қаласы Намангандағы «Аңыздар алқабы» саябағында биыл екінші мәрте ұйымдастырылған.
Бұл фестивальге Қырғызстан, Қазақстан және Ресей Федерациясынан келген 100-ден астам омарташылар мен мамандар өз өнімдерін ұсынды.
Фестивальдің ашылу салтанатына Өзбекстан фермерлер, шаруа қожалықтары және қожалық иелері кеңесінің төрағасы Актам Хаитов, Наманган облысының әкімі Шавкат Абдураззоков қатысты.
Атаулы іс-шара ынтымақтастық пен достықты нығайтуға, сондай-ақ омарта шаруашылығы саласында халықаралық тәжірибе алмасу алаңын құруға, инновациялық технологияларды енгізу арқылы ара шаруашылығын индустрияландыруға және әлемнің осы бағыты дамыған Ресей мен Қазақстан сияқты ең ірі 10 елдің қатарынан орын алуға бағытталған.
Фестиваль аясында мүмкіндігі шектеулі азаматтар мен күн көрісі төмен отбасыларға 1000 келі бал тегін таратылды.
Айта кетсек, былтыр алғаш рет ұйымдастырылған халықаралық бал фестиваліне Өзбекстан, Қырғызстан, Қазақстан, Тәжікстан және Ресей елінен 300-ден астам тәжірибелі омарташылар қатысқан.



















