Кеше, 30 маусымда Өзбекстан Президенті Шавкат Мирзиеевтің шақыруымен БҰҰ Бас хатшысы Антониу Гутерриш ресми сапармен Өзбекстанға келді.
Бұл туралы Еуразия Тудей Өзбекстан Премьер-министрі баспасөз хатшысының сөзіне сілтеме жасап хабарлады.
Ташкент халықаралық әуежайында Антониу Гутерришті Өзбекстан Премьер-министрі Абдулла Арипов және басқа да ресми тұлғалар күтіп алды.
Антониу Гутерриш Өзбекстанға екікүндік сапарында Шавкат Мирзиеев және басқа да осы елдің жоғары деңгейлі тұлғаларымен келіссөздер жүргізеді деп күтілуде.
Бүгін, 1 шілде күні өтетін келіссөздер барысында Өзбекстанның БҰҰ және оның институттарымен көпқырлы ынтымақтастығын одан әрі дамыту және нығайту мәселелері және аймақтық ынтымақтастықтың өзекті аспектілері талқыланады.
Сондай-ақ, сапар барысында Антониу Гутерриш бірқатар өндірістік және әлеуметтік нысандарда болып, екіжақты кездесулер өткізеді.
БҰҰ Бас хатшысы Антониу Гутерриш 4 шілде күнгі ШЫҰ саммитіне қатысу үшін Астанаға барады.
Сонымен қатар Антониу Гутерриштің Қырғызстанға, Тәжікстанға және Түркіменстанға сапары да жоспарланған.
Айта кетейік, БҰҰ-ның Бас хатшысы Антониу Гутерриш 2017 жылы Орталық Азия елдерінде соңғы рет ресми сапармен болған.



















