Ресей Қырғызстанда аса қауіпті инфекциялармен күрес жөніндегі жұқпалы ауруларды зерттейтін ғылыми орталық салады.
Бұл туралы «Sputnik Кыргызстан» агенттігі хабарлады. Агенттіктің хабарлауы бойынша, нысан қырғыз дәрігерлерінің сұранысы бойынша Бішкек қаласындағы Республикалық карантиндік және аса қауіпті инфекциялар орталығының базасында салынады.
Республикалық карантиндік және аса қауіпті инфекциялар орталығы директорының орынбасары Нурболат Усенбаевтың айтуы бойынша, Ресеймен бірлесіп жұқпалы аурулардың эпидемиологиясын зерттеу жөніндегі ғылыми орталықтың ашылуы Қырғызстандағы инфекционистердің жұмысын едәуір жақсартуға мүмкіндік береді.
Нурболат Усенбаев аталмыш инфекцияға қарсы күрес орталығы қызметкерлер үшін биоқауіпсіздік деңгейі жоғары зертхана болатынын айтады.
Ресей тарапы инфекцияға қарсы күрес орталығын салумен қатар, қырғыз мамандарын оқытумен де айналысады. Орталық толық іске кіріскеннен кейін қырғыз инфекционистері коронавирустың штаммдарын өз бетінше анықтай алатын болады. Бұрын үлгілер зерттеуге Ресейге, Германияға және Ұлыбританияға жіберілген.
Кейін орталық Қырғызстанның Денсаулық сақтау министрлігінің балансына беріледі деп жоспарлануда.



















